• USD 468.56

  • EUR 497.56

  • RUB 7.3

  • CNY 67.18

28 Naýryz, 14:21:55
Almaty
+35°

04 Naýryz, 2018 Segiz órim

Orynbasary ustalǵan Bozymbaev ornyn bosata ma?

О́z mekemesindegi bylyq-shylyqtan beıhabar bul qandaı mınıstr? Tanaýynyń astynda ne bolyp jatqanyn kórmeıtin basshyny bir kún de ondaı laýazymda ustamaǵan jón.

Baıaǵyda mıllıondap jegenderdi estýshi edik, qazir mıllıardty «ap» dep asaı salatyndarǵa etimiz úırendi. Tamaǵymyzǵa turyp qalady-aý deıtin bireýi bolsashy. Qanshasyn qamady – tyıylatyn túri joq: bir basyn kesseń, ekinshisi ósip shyǵatyn ertegilik aıdahardaı aýzyna túskendi jalmap jatyr. Ertegi demeske laj bar ma, nebir qııal-ǵajaıypqa kýámiz.

Áńgimeni áriden bastaıyq. Birer kún buryn Sybaılas jemqorlyqqa qarsy is-qımyl ulttyq bıýrosy energetıka vıse-mınıstri Ǵanı Sádibekovti tutqyndady. Tergeý málimetine súıensek, Sádibekov «Aımaq» merdiger uıymynyń basshysy D. Dýanbekpen astyrtyn sóz baılasyp, Shýchınsk-Býrabaı shıpajaıy aımaǵyndaǵy kóldi tazalaýǵa bólingen memleket qarjysyn jymqyrǵan. Qoldy bolǵan 1 mıllıard teńge tintý kezinde tárkilendi.

Baǵynyshty orynbasary osylaı ustalyp jatqanda bastyǵy ne isteý kerek edi? Eger azamattyq ustanymy aıqyn, memleketshil tulǵa bolsa, kisi betine qaraı almaı, kirerge tesik taba almaı qalýy kerek edi. Ondaı uıaty kúshti adamdar kúndiz kúlkiden, túnde uıqydan aırylar edi. Kinásizdigine eshkim kúmán keltirmese de, óz erkimen dereý otstavkaǵa keter edi. О́ıtkeni qolastyndaǵy qyzmetkeriniń jemqorlyq aıybymen tutqyndalýy – betke salyq, súıekke tańba, jýsań ketpeıtin qara daq. Mansabynan bas tartýǵa sonyń ózi jetkilikti.

Al energetıka mınıstri Qanat Bozymbaevtan ondaıdy baıqamadyq. Orynbasarynyń isti bolǵanynda isi joq pa, álde úıinde qara jamylyp qaıǵyryp otyr ma, áıteýir miz baqqan mınıstrdi kórmedik. Jalpy Bozymbaev pen Sádibekov dýetiniń saıası sahnada júrgenine segiz jyldan asypty. Ony dáleldep aramter bolǵansha áleýmettik jelini kezip ketken myna sýretke nazar aýdaraıyq.

Bozymbaev pen Sádibekov

Qanat Bozymbaev 2009 jyldyń 30 qarashasynan 2013 jyldyń 20 jeltoqsanyna deıin Jambyl oblysynyń ákimi laýazymyn atqardy. Al Ǵanı Sádibekov 2009 jyldyń jeltoqsanynan 2013 jyldyń jeltoqsanyna deıin Jambyl oblysy ákimi apparatynyń jetekshisi, ákimniń orynbasary boldy. Bozymbaev 2013 – 2016 jyldary Pavlodar oblysyn basqarǵanda Sádibekovti ózine orynbasar etip taǵaıyndady. 2016 jyly 25 naýryzda Bozymbaev energetıka mınıstri qyzmetine kirisse, 2016 jyly 3 mamyrda Sádibekov orynbasar bolyp shyǵa keldi.

Bul kezdeısoqtyq pa? Bizdiń oıymyzsha, áste olaı emes. Ekeýiniń ilik-shatystyǵy kózge badyraıyp-aq tur. Segiz jylda ábden syralǵy bolǵany anyq. Sybaılas jemqorlyqqa qarsy is-qımyl ulttyq bıýrosyna mynaý – tegin «podskazka».

Bıliktiń qaı butaǵyna but artsa da, artyna mingestirip alatyn Sádibekovtiń ne keremeti bar? Jambyl oblysyn aıtpaı-aq qoıaıyq, kúlli Kereký óńirinde, muqym Energetıka mınıstrliginde Sádibekovten basqa iske ilinetin eshkim tabylmaǵany ma?

Jaraıdy, jumysyna kóńili tolsa, sońynan súırep júre bersin. Árkim óz laǵyn teke qoıatyn zaman. Biraq senimdi seriginiń jaı-japsaryn Bozymbaev múlde bilmeýi múmkin emes. Segiz jyl degen – adamdy jattap alatyndaı merzim. Meıli, bilmeıdi delik. Sonda óz mekemesindegi bylyq-shylyqtan beıhabar bul qandaı mınıstr? Tanaýynyń astynda ne bolyp jatqanyn kórmeıtin basshyny bir kún de ondaı laýazymda ustamaǵan jón.

Negizi bizde birinshi basshynyń basyn qorǵap, bar kináni orynbasardyń moınyna ilip jiberetin úrdis qalyptasqan. Jemqorlyq aıybymen bastyqtar emes, orynbasarlar jıi sottalatyny da sondyqtan. Bireýdi jazalaý kerek bolsa, usaq sheneýnikter shyryldap kete barady. Bul – jalpy saıası júıedegi ahýal.

Al Bozymbaevtyń jaǵdaıynda nege bulaı boldy dep bal ashyp, bas qatyrmaımyz. Jelidegi jelaýyzdar neshe túrlini qopsytyp jatyr. Biz kórgenimizdi ǵana aıtamyz. Kórgenimiz – keıingi kezderi bul kisige de orynbasar qutaımaı qoıdy. Byltyr kúzde elimizdegi janar-jaǵarmaı tapshylyǵyna baılanysty Qanat Bozymbaevqa sógis jarııalanyp, onyń orynbasary Áset Maǵaýov qyzmetinen bosatylǵan. Memleket basshysy Bozymbaevpen kezdesý barysynda: «Tez arada tórtinshi zaýyt salý qajettigin aıtqan kezde, sizder onyń qajet emestigin, bizde janar-jaǵarmaı jetkilikti bolyp, qaıda jibererimizdi bilmeı qalatynymyzdy aıtyp, dáleldedińizder. Úkimettiń usynysymen men sizge sógis jarııaladym. Bul degen – qyzmetten bosatýmen birdeı shara», – dedi. Sonda Bozymbaev oılansa kerek edi. Ol oraıly sátti ózinshe paıdalanyp qaldy. «Meniń taǵdyrym prezıdenttiń qolynda», – dep Elbasyǵa adal berilgenin kórsetip baqty. О́ıtip máımóńkelemeı, azamattyq tanytyp otstavka surasa, biz biletin prezıdent betin qaıtarmas edi.

Energetıka mınıstri saraı ıntrıgasymen aınalysqansha nege halyqtyń máselesin sheshýge bas qatyrmaıdy dep qynjylasyń osyndaıda. Kúzde janar-jaǵarmaı tapshylyǵyna jol bergen kim? Bozymbaev. Qystyń qaq ortasynda kómir tapshylyǵyna jol bergen kim? Bozymbaev. Osyǵan tikeleı jaýapty bolǵan soń kinásin moıyndasa jaqsy ǵoı. Joq, ol birese «kómir tapshy degen – jalǵan sóz» dep halyqty ótirikshi qyldy, birese jergilikti ákimdikterdi aıyptady. Áıteýir ózine shań jýytpaı qoıdy. Qazaqstan – álemde jan basyna shaqqanda kómirdi eń kóp óndiretin el. Bozymbaev energetıka mınıstri retinde joqtan bar jasaýdyń ornyna, bardyń ózin uqsata almady. Endigisi mynaý. Qaıda barsa da qasynan tastamaıtyn jantorsyǵy jemqorlyq aıybymen tutylyp jatyr.

Aıtpaqshy, jaqynda prezıdent Qanat Bozymbaevqa jarııalaǵan sógisti alyp tastady. Arada úsh kún ótpeı jatyp orynbasary tutqyndaldy. Jeldiń qaı jaqtan soǵyp turǵanyn ishińiz sezgen shyǵar. Budan keıin Bozymbaev qyzmetinen kete me dep suraýdyń ózi qısynsyzdaý sııaqty. Ertegi demeı kór endi.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir