Aıbek Qalıev «Aıtystyń aqtangeri» atandy (vıdeo)

Almatyda 29, 30 jeltoqsan kúnderi «Táýelsizdikke tartý» atty aıtys ótti, dep jazady Qamshy.kz tilshisi.

Júrsin Ermannyń basqarýyndaǵy Aıtys aqyndary men jyrshy, termeshilerdiń Halyqaralyq Odaǵy uıymdastyrǵan aıtysqa keledi dep habarlanǵan Rınat Zaıtov, Dıdar Qamıev syndy keıbir aqyndar kelgen joq. Aıtysqa qatysqan 18 aqynnyń bári bıyl respýblıkanyń ár aımaqtarynda ótken túrli aıtystardyń jeńimpazdary.

Aıtys nátıjesi boıynsha 8 aqynǵa júlde berilse qalǵan 10 aqynǵa 100 myń teńgeden shabyttandyrý maqsatynda aqshalaı syılyq tapsyryldy. Bas júlde «Aıtystyń aqtangeri» ataǵy men temirtulpar Aıbek Qalıevke buıyrdy. 1-oryn Jansaıa Mýsınaǵa (1mln) buıyrsa, 2-oryn Erkebulan Qaınazar men Meıirbek Sultanhanǵa (500 myńnan), 3-oryn Ershat Qaıboldın, Qalıjan Bildashev, Tilegen Ádilov syndy 3 adamǵa 200 myń teńgeden berildi.

Oǵan qosa «Tas kredıt» kompanııasynyń Bas dırektory Dýlat Tastekeevtiń arnaıy júldesi jalpy kólemi 1 mln 800 myń  teńgelik aı saıynǵy 150 myń teńgeden stependııa Ásem Erejeqyzyna buıyrdy. Al, Tóreǵalı Tóreáli óz atyndaǵy qordyń arnaıy syılyǵy myń dollardy Aspanbek Shuǵataevqa tabystady.

Aıta ketsek, osydan bir apta ýaqyt buryn ǵana dál osyndaı atpen Almatydaǵy «Alataý» dástúrli óner teatrynda aıtys ótken bolatyn. Oǵan qosa 5 jyldan beri dástúrli bolyp qalǵan «Altyn dombyra» aıtysy da Aqtóbede túsiniksiz jaǵdaıda ótken edi. Basynda «Jyr arqaýy — jańǵyrý» dep habarlanǵan aıtystyń júldesi tapsyrylarda bıylǵy «Altyn dombyra» aıtys ekeni habarlanǵan. Ol aıtysty Mádenıet jáne sport mınıstrligi uıymdastyrǵan. Oǵan qatysqan aqyndar osy jolǵy Almatydaǵy aıtysqa qatysqan joq. Al Almatydaǵy aıtysty jekeleı kásipkerler qarjylandyrǵan.

Aıtystyń júldesin tapsyrar kezde qazylar alqasyna tóraǵalyq etken Asanáli Áshimov «Aıtystyń eń joǵary ataǵy — Aıtystyń aqtangeri» dep málimdedi. Aıtysqa sonymen qosa «Aıqyn» gazetiniń basshysy Nurtóre Júsip, tanymal aıtys aqyndary Serik Qalıev, Dáýletkereı Kápuly, Baýyrjan Halıolla, «Qazaq ádebıeti» gazetiniń bas redaktory Janarbek Áshimjandar qazylyq etti.