«Qamshynyń» talabyn, Ońtústiktiń qadamyn Qostanaı da qoldady

Esterińizde bolsa «Qamshy» portaly «1 qańtardyń» atyn atap, túsin tústep, aspandatpaýdy óziniń buljymas qaǵıdasyna aınaldyrǵan. Ile-shala Ońtústik Qazaqstan oblysynan da súıinshili habar jetip edi. Endi mine, «orystanǵan» oblystardyń da qozǵalatyn túri bar. Ony Qostanaı oblysy ákiminiń blogyna jazylǵan myna hat pen oǵan jazylǵan jaýaptan bildik. 

15 qarasha 2012

Qaharly:

Qurmetti Nuraly Mustafauly!

Bizder jyl saıyn bir túsiniksiz jaıttyń kýási bolyp júrmiz. Mysaly, jeltoqsan aıy bastalmaı jatyp, «1 qańtardy» qarsy alýǵa baılanysty jarnamalar kóbeıip (qala kóshelerinde de, tele-/radıo, gazet-jornaldarda jáne t.b.), al odan jarty aı buryn bolatyn QAZAQSTANNYŃ ULTTYQ MEREKESI -16-17 JELTOQSAN tasada qalyp qoıady. Bul jóninde kezinde «Qamshy» portaly qazaq jýrnalısterine úndeý tastaǵan. Ata-babalarymyzdyń bilektiń kúshimen, naızanyń ushymen qorǵaǵan atamekenimizdiń TÁÝELSIZDIGIN alǵany EREKShE KÚN EMES PE?

Osy oraıda aıta keteıin degenim, jýyrda atalǵan "Qamshy" portalynda maqala jarııalandy. Onda "Ońtústik Qazaqstan oblysynyń ákimi

Asqar Myrzahmetov táýelsizdik merekesine deıin «1 qańtardy»  jalaýlatpaýdy qol astyndaǵylaryna tapsyrǵandyǵy aıtyldy.

Qostanaı oblysy da Qazaqstannyń jeri emes pe? «1 qańtardy» TÁÝELSIZDIK MEREKESINE DEIIN jarnamalaǵanda ELIMIZDIŃ ULTTYQ MEIRAMYNA durys kóńil bólinbeı qalady. Sonda bizder EGEMENDIKTI JAQTYRMAITYN, OǴAN QÝANBAITYN bolǵanymyz ba?

Osyǵan oraı usynysymyz: Táýelsizdik kúnin toılap ótkenge sheıin «1 qańtar» týraly jarnamanyń da, qala ortalyǵyna (oblys qalalarynda, aýdandarynda) shyrsha ornatylmasa eken. Táýelsizdikti basqa memleketter sııaqty jaqsy qarsy alaıyq? Ne degenmen ULTTYQ MEREKE mártebesi bar JALǴYZ meıram ǵoı...

23 qarasha 2012  

Jaýap beredi: Sadýakasov Nýraly Mýstafınovıch

Qurmetti Qaharly:

Shynynda da, kóp jyldar boıǵy qalyptasqan dástúrge baılanysty, «1 qańtardyń» kelýinen kóp buryn eldi mekenderde merekelik is-sharalarǵa daıyndyq bastalady.

«1 qańtar» jónindegi is-sharalardy aıdyń basynan bastap júrgizý, sol sııaqty memlekettik organdarynyń bekitilgen tarıf boıynsha merekelik is-sharalarǵa bólingen bıýdjettik qarajatty qarjy jylynyń aıaǵyna deıin ıgerýleriniń qajettiligine de baılanysty.  Osy másele boıynsha sizdiń ustanymyńyzdy qoldaımyz.

Budan buryn jergilikti atqarýshy organdaryna «1 qańtardy» qarsy alý jańa memlekettik mereke - Tuńǵysh Prezıdenttiń Kúnine jáne ulttyq mereke - Táýelsizdik Kúnine oraı taqyryptyq resimdeýden basym túspeýi jóninen usynystar berildi.

Táýelsizdik Kúni barsha qazaqstandyqtar úshin eń basty mereke boldy jáne solaı bolyp qala beredi de.

Keıbir sózder «Qamshy» portalynyń ustanymy boıynsha «1 qańtar» dep alyndy.