Kóshi-qon týraly zań. Qazaqty aldaý qashanǵa deıin jalǵasady?

Halqymyz úshin TÁÝELSIZDIK KÚNI merekesiniń orny bólek, árıne. Ol týraly sanaýly kúnderden keıin, sát-saǵatynda jazatyn bolamyz. Al, shette tarydaı shashyrap júrgen bes mıllıon qandasymyz turǵysynan alǵanda, búgin – 13 JELTOQSAN da sondaı qasıetti, mártebeli kún sanalady. Osydan tup-týra on tórt jyl buryn, atap aıtsam, 1997-jyldyń dál osy 13-jeltoqsanynda Táýelsiz Qazaqstannyń Tuńǵysh Prezıdenti, Ult Kóshbasshysy Nursultan Nazarbaev tuńǵysh ret qabyldanǵan «Halyqtyń kóshi-qony týraly» zańyna qol qoıǵan bolatyn. Atalmysh Kóshi-qon Zańyn sol kezdegi Májilis depýtaty, qazaqtyń belgili aqyny Ákim Ysqaqtyń uıtqy bolyp jasaǵanyn bul kúnde el ańyz etip aıtady. Sóıtip, Ákim Ysqaq - Birinshi shaqyrylǵan Qazaqstan Respýblıkasy Parlamenti Májilisiniń depýtaty jáne tuńǵysh qazaq tilinde jazylǵan «Halyqtyń kóshi-qony týraly» zańynyń avtory bolyp tarıhta qaldy. Ákim myrza álemdik tájirıbe men zańnamalardy negizge alyp, alystan kelgen baýyrlarymen aqyldasa otyryp jasaǵan sol zańnyń arqasynda qanshama qazaqtyń Atajurtqa oralǵanyn ózderińiz jaqsy bilesizder. Sol qasıetti 13-jeltoqsan bıyl demalys kúnine týra keldi. Jyl basynan beri qaıta qaralsyn dep Elbasy tapsyrma berip, áne-mine ózgerister engiziledi degen sol Kóshi-qon Zańy Úkimet qorjynynan Parlamentke túspegen kúıi bul jyl da aqyralasyp barady. Tamara Dúısenova men Aslan Qarjaýbevtyń qarsha boratyp shúıinshi suraǵan habarynyń da esh qaıyry bolmady. Alystan kelgen aǵaıyn ne turaqty tirkeýge tura almaı, ne azamattyqqa qol jetkize almaı bir jyldy sarsańmen ótkizdi. Ult ekige bólingen kúıi kún keship jatyr. О́kinishti!!! Esesine, Elimiz álemdegi damyǵan elý eldiń qataryna qosyldy. 2017-jyly EKSPO kórmesin ótkizedi. Bıyl 29-mamyrda Qazaqstan, Reseı, Belarýs memleket basshylary EEO-na qol qoıdy... Odan arǵysyn aıtyp, sanap taýysý múmkin emes! Talap bireý-aq: Qazirgi qoldanystaǵy Kóshi-qon zańyna shetten kelgen qazaqqa jeńildetilgen tártippen úsh aıdyń ishinde azamattyq berýgizetin jalǵyz-aq sóılem engizý!

Aýyt Muqıbek