Úsh aǵaıyndynyń týystary: Sot úkimine de, oryndalýyna da kóńilimiz tolmaıdy

Almaty oblysy Jambyl aýdanynda aıýandyqpen óltirilgen úsh aǵaıyndy jigittiń biri Qadylbek Álimhanulyna jyldyq as berildi dep jazady Qamshy.kz. Taldyqorǵanda ótken jyldyq asqa isti baqylaýda ustaǵan «Qamshy» tilshisi Erlan Tóleýbaı arnaıy shaqyryldy. Myń qaraly jınalǵan asqa istiń basy-qasynan eriktiler qosynyn uıymdastyryp júrgen Dáýletjan Shaımaran, Omaráli Ádilbekuly, Shalqar Axmetbaı, Abdiraxman Qamanshaı, Bolat Akram sııaqty atqa miner azamattar at terletip keldi.

«Qamshy.kz» aqparat agenttigi mal saýdasymen aınalysqan aǵaıyndy úsh jigittiń ólimine qatysty Uzynaǵash aýylynda bolǵan qylmystyq istiń jaıyn jiti baqylap, oqyrmandaryn úzdiksiz aqparattandyrǵan edi. 

Qamshy.kz tilshisi Qadylbetiń ákesi Álimhan Ajydarulynan sottan keıingi marqumdardyń otbasynyń jaǵdaıyn surady.

«Biz balamyz Qadylbek jáne onyń dostary Muqııat, Jarqynbek qatarly azamattar qaıtys bolǵanyna bir jyl boldy. Qazir Qadylbektiń jyldyǵyn berip otyrmyz. Alys-jýyqtan kóptegen qamqor aıaýly azamattar názirge qatynasyp jatyr. Jalpy halyqqa, kópke raqmetten basqa aıtarymyz joq. Bul balalardyń art jaǵyna kóptiń qamqorlyǵy az bolǵan joq. О́tken jyly qarashada sot bolyp, úkim shyǵarylǵanyn bilesizder. Alaıda sot úkimi ishinara atqarylmaı jatyr. Sot úkiminiń tolyqtaı atqarylýyn shyn júrekten úmit etemiz. Basqa ne aıtamyz...», – dedi taýsyla marqumnyń ákesi.

Al marqumnyń jubaıy Nurıpa Dúısenbaı «Qytaıdaǵy týǵan-týystardyń ýaqyt yńǵaıyna qaraı Qadylbektiń jyldyǵyn erte berip otyrmyz. Sottan keıin eshqandaı nátıje joq dese de bolady. Bir sózben aıtqanda biz sot sheshimine de, sol shyqqan sot úkiminiń oryndalýyna da razy emespiz. Azamattardyń artyndaǵy bala-shaǵasy qalaı kún kóredi? Qandyqol jaqtan eshkim kelgen joq, ol jumys istemeıdi, eshteńesi joq dep bizge eshqandaı materıaldyq ótem jasalmady. Bılik oryndarynan da jaǵdaımen tanysyp, hal surap keletini bolmasa, naqty kómek jasalmady», – deıdi.

Esterińizge salsaq, ótken jyly 29 qarashada mal satýmen aınalysatyn aǵaıyndy úsh azamat Jarqynbek Doldanuly, Muqııat Zarlyhanuly men Qadylbek Álimhanulyn óltirdi degen negizgi aıyptalýshy Talǵat Súleımanovqa sot ómir boıy bas bostandyǵynan aıyrý jazasyn kesti. Ol jazasyn erekshe túzimdegi kolonııada óteıtin bolady. Al, T. Súleımanovtyń sybaılasy Murat Ońalbaev 25 jylǵa bas bostandyǵynan aıyrylyp, qatań túzimdegi kolonııaǵa jiberiletin boldy.

Qandy qylmysty kórip, quqyqqorǵaý organdaryna habarlamady dep aıyptalǵan malshy Baqyt Baıqasymovqa sot tórt jyl bas bostandyǵynan aıyrý jazasyn kesti.

Budan bólek, sot sheshimimen T. Súleımanov pen M. Ońalbaev árqaısysy qaıtys bolǵan ár azamattyń otbasyna 10 mıllıon teńgeden moraldyq shyǵyndy óteýge mindetteldi.

Marqumdardyń týystary sotqa deıin-aq: «marqumdardyń týys-týǵandary atynan qylmyskerlerdi túgeldeı atýyn, kózderin qurtyp, ólim jazasyna kesýin talap etemiz!» – degen edi.

Sottan keıin kisi qolynan qastandyqpen ólgen aǵaıyndy úsh azamattyń otbasylaryna erikti azamattar uıysyp kómek qolyn sozǵan bolatyn.

Aıta keteıik, 18 qyrkúıekte Almaty oblysy Jambyl aýdanynda joǵalǵan úsh azamattyń qylmyskerler qolynan qaza tapqany, osy qylmysqa qatysty kúdikti retinde 24 qyrkúıekte eki azamattyń ustalǵany habarlanǵan bolatyn.

Atalǵan úsh azamat, 1979 jylǵy Doldanuly Jarqynbek, 1973 jylǵy Zarlyhanuly Muqııat pen Álimhan Qadylbek esimdi jigitter Shyǵys Qazaqstan oblysynyń Tarbaǵataı aýdanynan 40 bas mal satyp alyp, ony eki júk kóligimen 17 qyrkúıek, senbi kúni, Almaty mańyndaǵy Uzynaǵash bazaryna shyǵarǵan.

Qaperińizge salsaq, Atalǵan qylmysqa baılanysty Úkimet basshysy Baqytjan Saǵyntaev: «Almaty oblysynda qylmyskerler ustalǵany belgili boldy, tergeý sharalary júrip jatyr. Bul halyqty alańdatyp otyrǵandyqtan, bul jaıynda bizge málimet berseńiz» dep, Qalmuhambet Qasymovqa isti tolyqtaı óz baqylaýyna alýyn tapsyrǵan bolatyn.  

Tipti, Senat tóraǵasy Qasym-Jomart Toqaev: ««Almaty oblysynda úsh aǵaıyn mal úshin óltirildi, 9 bala jetim qaldy. Bul qasiret. IIM muqııat tergeý jasap, kinálilerdiń bárin jazaǵa tartatynyna senemin», – degen edi.

Alaıda marqumdardyń qara jer qoınyna berilgenine jyl ótse de, týystary sot sheshimine de, sot úkiminiń oryndalýyna da narazy.

 

Erlan Tóleýbaı