Qazaq jýrnalısterine hat. «Jańa jyl» degen sózdi naýryzǵa deıin umytaıyq!

Qazaqtyń nemese táýelsiz Qazaqstannyń jańa jyly – 22 naýyryz. Endeshe ár jyldyń 1 qańtaryn alaqaılap qarsy alý abyroısyzdyqtan basqa túk te ákelmeıdi. Sondyqtan ol kúndi umytaıyq. Atyn da atamaıyq. Umytýdyń basy – «Jańa jyl» degen sózdi naýryzǵa deıin qaperimizge almaýdan bastalsyn! Buǵan ózin táýelsiz eldiń baspasózimin dep esepteıtin gazet-jýrnal men telearnalar, táýelsiz eldiń sóz ustarymyn deıtin kez kelgen  jýrnalıst pen qalamger qýana kelisedi dep senemiz.

Elbasy N.Nazarbaevtiń ózi: «Túptep kelgende bizdiń naǵyz Jańa jylymyz osy Naýryz bolýy qajet… Túbinde osy merekege kelýimiz kerek. Bul halqymyzdyń, táýelsizdigimizdiń eń negizgi tamyrynyń biri bolyp sanalady» dep edi. Memleket basshysynyń aýyzynan shyqqan ár sózin qurandaı jattap alatyn sheneýnikterdiń dál osy «naýyryzǵa» nemese til máselesine, ult múddesine qatysty áńgimelerge kelgende tas kereń bolyp qalatyny belgili jaıt. Meıli ondaı qaǵynan jerigenderdi «teksiz» deıik, «máńgúrt» deıik. Báribir júrekteri tumshalanǵan. Sondyqtan bar salmaq eń aldymen qazaq jýrnalısterine túsetini aıdan anyq.

Muhtar Taıjan aǵamyz budan keıin orys tilinde suhbat berýden bas tartty. Bul naqty qadam. Qazaq jýrnalısterine de sol kerek. 1 qańtardy «Jańa jyl» dep aıtqysy kelgender aıtsyn, jazǵysy kelgender jazsyn. Bir apamyz: «О́zińniń kóziń kók, sóziń kóp eken» dep edi oryssha sóılegen bireýge. Sol aıtpaqshy sózdi kóbeıtpeıik. О́zimizden bastaıyq. «Qamshy» portaly naýryzǵa deıin ıaǵnı 1 qańtardyń aldy artynda «jańa jyl» degen sózdi jazýdan, aıtýdan bas tartady. Meıli ol «jańa jylǵa» qarsy jazylǵan maqala bolsa da...

Basty maqsat – elemeý.

Sýret ǵalamtordan alyndy