Táýelsizdik meıramyna - 35 kún qaldy. Siz qalaı qarsy alasyz?(saýalnama)

     Táýelsizdik meıramyna 35 kún qaldy. Qaırattyń qany, Lázzattyń kóz jasy tamǵan Almaty bıyl bul merekeni qaı deńgeıde atap óter eken? Álde jyldaǵydaı "1 qańtardyń" qaltarysynda qalyp qoıa ma? Byltyr keıbir oblystarda 31 jeltoqsanǵa bir jarym aı buryn daıyndyq bastalyp,16-shy jeltoqsan naǵyz jumystyń qyzǵan shaǵy boldy. Bir ǵana Pavlodar oblysynyń ákimdigi "1 qańtar" úshin bıýdjettiń 38 mıllıon teńgesin shyrshaǵa shyǵyn qylǵan.

Al, Táýelsizdik meıramyn Siz qalaı qarsy alasyz?

Aıdos Sarym,saıasattanýshy:

Shynyn aıtsam, bilmeıdi ekenmin. Bireýge demalys bolsa, saıasat mańynda júrgen adamdar úshin bul kún jumys. Qazirden bastap josparlanyp qoıylǵan sharalar bar, solarǵa qatysamyn. Jyldaǵy dástúr boıynsha Almatydaǵy Táýelsizdik eskertkishine baryp, el azattyǵy úshin kúresken, osy jolda sheıit bolǵandarǵa táý etemin.

Aýyt Muqıbek, aqyn:

Búkil dúnıe júzindegi qazaqtar toılaıtyn jalǵyz mereke, uly mereke - ol- Táýelsizdik merekesi. Bul Naýryz merekesinen de bıik, qundy. Naýryz búkil túrki halqyna ortaq. Jańa jyl dep júrgen 1-qańtardyń qazaqpen esh qatysy joq. Ol bizge ozbyr bıleýshilerden qalǵan "mura". Al, qalǵan merekeler de jeterlik qoı, merekeniń bolǵany jaqsy. Qalaı desek te, qazaq halqy úshin, Qazaq eli úshin bar merekeden Táýelsizdik merekesiniń orny da, qýanyshy da alabóten. Al, qalaı toılaımyn? Eń aldymen eń jaqyn aǵaıyn týysty quttyqtaımyn, arǵy bettegi qandastaryma da telefon shalam. Aqsham ketti dep esh aıamaımyn. Sosyn Qudaıdyń bul kúnge jetkizgenine táýbe keltirem. Shettegi aǵaıyndardyń da tezirek elge orlýyn tileımin. Azattyq jolynda mert bolǵan, ter tókken ata-aǵalarymdy eske alyp, duǵa baǵyshtaımyn. Hasen aǵa Oraltaıdyń "Elim-aılap ótken ómir" kitabyn paraqtaımyn. Batyr naǵashylarym Ákpar-Seıit jóninde jazylǵan nárselerdi, sheshem aıtqan áńgimelerdi oıyma jańǵyrtam.

Nurlan Sádir:

Ýaǵaleıkým assalam. Úıde táýelsizdik jolynda sheıit bolǵandarǵa arnap biletin súrelerimnen duǵa qylamyn. Ataýly kúnniń qarsańynda jumysta saltanatty jıyndy uıymdastyrýǵa at salysamyn, sóz sóıleımin. Táýelsizdik týraly óz oılarymmen bólisemin. Jumysta túski úzilis kezinde dastarhan jaıyp, ujym bolyp sháı ishemiz. Táýelsizdik týraly pikirimiz bir jerden shyqpaıtyn bolǵandyqtan aıtysyp ta alamyz. Byltyr da, odan buryn da Jańaózen oqıǵalaryna arnalǵan jıyndarǵa qatystym. Ondaı shara taǵy uıymdastyrylyp jatsa, buıyrsa, bıyl da baryp qara kóbeıtetin nıetim bar.

Aıdos Juqanuly,jýrnalıst:

Táýelsizdik merekesin qarsy alý úshin ony seziný kerek. Men sezingen emespin. Táýelsizdik Monýmentine táý etýge barǵanda, qarama qarsysynda Hakim emes ákim pıanınoda "Alma - Ata - moıa pervaıa lıýbov" dep ándetip otyrady. Odan qalsa «Novyı Godqa» daıyndalyp jatady. О́z tilinde erkin sóılep, oınap-kúlip, ýaıym-qaıǵysyz júretin ortany ǵana Táýelsiz dep bilem. Ondaı ortany Túrkistannan, batystaǵy Beıneýden, ońtústik shyǵystaǵy Narynqoldan, shyǵystaǵy Tarbaǵataıdan, qıyr shyǵystaǵy Baı-О́lkeden ǵana kórdim. Almaty men Astanadan kórmedim. Al Almaty men Astana qazaqtanbaıynsha, Qazaqstanǵa Táýelsizdik joq. Ony áperetin 30-50 jas aralyǵyndaǵy myqty jigitter kóp. Jolatpaıdy. О́ıtkeni, "shómele ústinde ıt jatyr, ne ózi jemeıdi, ne ózgege jegizbeıdi". Bylaısha aıtqanda, tynysh qana alym salyqty tólep otyrǵan artyq dep esepteıdi. Jerin qorǵap qalǵan 5 mln. fınder qurly joqpyz. Táýelsizdik táýekelsiz kelmeıdi. Sebebi, tegin jatqan azattyq joq. Qysqasy, Táýelsizdik kúnin táýelsiz ekenimdi tolyq sezingen kezde ǵana qarsy alarmyn.

Qul-Kerim Elemes, aqyn:

Áýeli Allah taǵalaǵa san shúkir etip, eki bas namaz oqımyn! Sosyn balalaryma onyń máni men oryny jáıli bilgenimdi, tilimniń jetisinshe aıtamyn. Olardyń da kózqarastaryn tyńdaımyn! Arnalardan ol jáıli el ne dep jatqanyn estip kóremiz. Al, endi, jylda kóńilimdi buzatyn nárse - ol merekeniń ylǵı da "jańa jyldyń" kóleńkesinde qalyp qoıatyny...

Tólen Ramazanuly:

Jospar boıynsha, tańerteń balalarymmen meshitke baryp, ár jyldary el táýelsizdigi jolynda qurban bolǵan azamattardyń arýaqtaryna Quran baǵyshtap, sosyn qala ortalyǵyndaǵy merekelik sharalarǵa qatysýymyz kerek.