• USD 468.56

  • EUR 497.56

  • RUB 7.3

  • CNY 67.18

28 Naýryz, 19:40:47
Almaty
+35°

31 Mamyr, 2017 Uly kósh

Keıbir azamattar Qytaıǵa ketken týystarynyń negizsiz qamalyp, oralmaı jatqanyn aıtady

Búgin birneshe ondaǵan Qazaqstan azamaty Qytaı elshiligine dat aıta bardy dep habarlaıdy

Búgin birneshe ondaǵan Qazaqstan azamaty Qytaı elshiligine dat aıta bardy dep habarlaıdy Qamshy.kz tilshisi.

Belgili bolǵandaı Qytaıdyń Almatydaǵy elshiligine Qytaı bıligi ókilderiniń delegasııasy kelip, Qazaqstan azamattarynyń, Qazaqstandaǵy Qytaı azamattarynyń qujattyq qıyndyqtary men máseleleri týraly bazynalaryn tyńdaıtyn bolǵan. Osyndaı habarlama sońǵy aptada áleýmettik jelini kezip ketken. Osyǵan oraı arasynda BAQ ókilderi bar qarasy kóp qaýym búgin Qytaı elshiligi aldyna jınaldy.

 

Al, Raýshangúl esimdi hanym Qazaqstanǵa kóship kelgenine 12 jyl bolǵanyn aıtady. Onyń kúıeýi Qazaqstan azamattyǵyn alǵan qazaq. 23 naýryzda Úrimjige týrızm kompanııasyna jınalysqa ketken kúıeýi sol kúıi oralmaǵan. «Kúıeýim jınalystan soń ózimizdiń aýyl Turpanǵa barǵan. Sol jerden Qytaıdyń adamdary kelip alyp ketti. Odan beri 2 aı boldy. Estýimizshe Qaramaıly túrmesinde jatyr eken. Meniń aıtpaǵym úsh balmen qaldym. Kúıeýimniń qandaı kinási bar ekenin aıtpastan, eshqandaı aıypsyz qamaýda ustap otyr. Kúıeýimdi qaıtarsa, ótineıin, men qınalyp kettim», - deıdi úsh balanyń anasy.

 

Alaýyraıaq kelinshek Jazıra Muqashqyzy enesiniń qujattar sharýasymen Qytaıǵa ketkenin, barǵan soń barlyq qujattaryn jergilikti bıliktiń alyp alǵanyn aıtady. «Ol kisiniń barar jeri, basar taýy joq dalada qaldy. Úsh aıdan beri kimge júginerimizdi bilmeımin. О́zimniń azamattyǵym Qazaqstan azamattyǵy. Enem Qytaı azamaty. 98 jyly Qazaqstanǵa kóship kelgen. Bala-shaǵamyz da tolyqtaı Qazaqstan azamaty. Enem bala-shaǵasyn asyraımyn dep Qytaıda 35 jyl pedagog bolyp zańdy túrde zeınetke shyqqan. Qujattarynyń bári durys bolsa da bala-shaǵasynyń ortasyna endi kelip-ketip júrgende ony jibermeı otyr. Osynyń sebebin túsindirse eken», - deıdi kelini.

Bul jınalǵan qaýymnyń tek ekeýiniń bazynasy. Osyndaı talap-tilegi bar eldiń qarasy kóp. Túrli oblystar men aýyldardan da jıi habarlasady. 

60-qa jaqyn adam talap-aryz jazyp qol qoıǵan hat Qytaı elshiligine tabystalǵan. Halyq aldyna shyqqan delegasııa ókili tek hatty alyp kirip ketken. Eshqandaı da túsinikteme jasamaǵan.  Elshilik ǵımaratyna  delegasııa ókilderimen kezdesý úshin «Jebeý» respýblıkalyq qoǵamdyq birlestigi ókilderi men birneshe azamat kirgen.

Erlan Tóleýbaı

 

QHR delegasııa ókilderine

Qazaqstan Respýblıkasynyń

azamattary atynan

 

Qurmetti delegasııa ókilderi!!!  Qazaqstan Respýblıkasy men Qytaı Halyq Respýblıkasy ejelden tatý kórshi, ári dos el. Biz osyǵan deıin Qytaı Halyq Respýblıkasynda týyp ósip, QHR ádil saıasaty astynda emin-erkin, baıashatty ómir súrip keldik, osy ýaqytqa deıin tómendegideı zańnan tys, adamdardyń quqyǵyn shektegen jaǵdaılardy kórmegen edik.

Tómende QHR ShUAR-ǵa qarasty aýdan- aımaq jergilikti ókimeti tarapynan jasalyp otyrǵan zańsyz saıasattary týraly sizderge málimdeımiz;

  1. Qazaqstan Respýblıkasynda túrli kásippen aınalysyp jatqan, qoldarynda zańdy tólqujattary bar Qazaq azamattarynyń tólqujattaryn belgisiz sebeppen jıyp alyp, túrli syltaýlarmen ýaqytynda tólqujattaryn qaıtaryp bermeı otyr, bul QHR azamattardyń shetelge emin-erkin kirip-shyǵýy zańnamasyna qaıshy kelip otyr;
  2. Bir otbasynyń barlyq tólqujattaryn jınap alyp, ishindegi bir múshesine bermeı, olardyń Qazaqstanǵa otbasymen tolyq shyǵýyna tıym salyp otyr;
  3. Tólqujattardy tolyq jáne ýaqytynda bermeý sebepti alyp qoıǵan vıza kezegine ýaqytynda bara almaı, vıza ashtyrýyna kedergi bolyp otyr;
  4. QHR da zeınetke shyǵyp, zańdy túrde Qazaqstan Respýblıkasyna kóship kelgen zeınetkerlerdi belgisiz sebeppen qaıtadan shaqyryp alyp, olardy Qazaqstanda turaqty turýyna ruqsat bermeı, otbasynan aıyryp tek QHR-da turýǵa májbúrlep otyr, egerde olar QHR-ǵa barmasa jáne QHR azamattyǵynan shyǵyp QR azamattyǵyn qabyldasa olardyń zeınet aqysyn toqtatyp otyr, bul týraly QHR zańynda shet el azamattyǵyn alǵan azamattardyń zeınet aqysy toqtatylmaıtyny anyq jazylǵan;
  5. QHR-nyń Qazaqstandaǵy elshiligi tek Qazaqstannyń jergilikti turǵyndaryna ǵana toptyq vıza berip, QHR-nan kelip Qazaqstan azamattyǵyn alǵandarǵa belgisiz sebeptermen vıza bermeı otyr;
  6.  QHR-nan kelip Qazaqstan azamattyǵyn alǵandarǵa vıza berý úshin QHR dan týystyq baılanysy týraly anyqtama talap etip otyr, biraq bul anyqtamany QHR jergilikti ókimeti bermeı otyr;
  7. Qazaqstan Respýblıkasynyń azamattyǵyn alǵan adamdardyń QHR jergilikti ókimeti shaqyrtyp alyp, olarǵa ózi turǵan orynnan tirkeýin (naposyn) óshirýin talap etip otyr, bul QHR zańy boıynsha azamattardy tirkeýden óshirý jergilikti ókimettiń quzyryndaǵy jumys.
  8. QHR daǵy qazaq qandastarymyzǵa túrli úreı týdyratyn, aýyzsha buıryqtar jasap olarǵa Qazaqstandaǵy týys-týǵandarymen baılanys ornatpaýǵa, Wechat, WhatsApp sııaqty baılanys quraldaryndaǵy toptardan shyǵýǵa májbúrlep, ulttyq merekelermen quttyqtaýǵa tyıym salyp, halyqty úreılendirip Qazaqstan memleketin jergilikti qalyqqa qorqynyshty etip kórsetýde;
  9. QHR-daǵy Qazaq azamattar balalaryn Qazaqstannyń bala-baqshalarynda, mektepterinde, joǵary oqý oryndarynda oqytýyna tyıym salyp otyr, ári Qazaqstanda oqyp jatqan oqýshylardy qaıta shaqyryp jatyr;

Joǵarydaǵy qoldan jasalyp otyrǵan zańsyzdyqtar QHR –nyń halyqaralyq bedeline nuqsan keltirip, QHR-dy Shetelge qorqynyshty, dıktatýralyq qatigez memleket retinde kórsetip otyr ári eki el azamattarynyń saýda-sattyq, iskerlik áriptestigine qıyndyq týdyryp otyr.

            Qurmetti delegasııa ókilderi sizderden osy zańsyzdyqtardyń qatań tekserip, jaýapty adamdardy jazalap, eki el dostyǵyn odan ary nyǵaıtý, halyqaralyq baılanysty qalpyna keltirý jolynda óz yqpaldaryńyzdy kórsetýlerińizdi suraımyz!!!

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir