Sholý: Ushaq apaty týraly AQSh pen Eýropa baspasózi ne dep jatyr?

Amsterdamnan Kýala-Lýmpýrǵa bet alǵan malaızııalyq jolaýshylar ushaǵynyń Ýkraına shyǵysynda atyp túsirilgeni álem aqparat quraldaryn shýlatyp jatyr. Oqıǵaǵa baılanysty BUU qaýipsizdik keńesi shuǵyl otyrys ótkizdi. Oryn alǵan apattyń jaýapkershiliginen Ýkraına jaqtyń da, reseıshil separatısterdiń de qashqalaqtap jatqanyn jazady álem aqparat quraldary. «Ushaqta seksen jas bala, úsh sábı jáne Melbýrnde ótetin SPID-ke qatysty halyqaralyq konferensııaǵa bara jatqan júz maman, bir áıgili matematık taǵy bir BUU qyzmetkeri bolǵan», - deıdi Deılı Meıl.

Batys aqparat quraldary ushaqty atyp túsirýshiler reseıshil separatıster bolý múmkindigi óte joǵar ekendigin aıtýda. «Ýoll-strıt djornal» men «Vashıngton Post» gazetteri «AQSh arnaýly qyzmetiniń alǵashqy qortyndysy boıynsha, separatıster ushaqty atyp túsirgendigi anyqtaldy»,-degen mazmunda maqalalaryn jarysa jazdy. Al, CNN-dyqtardyń aıtýy boıynsha, bir AQSh qorǵanys qyzmetkeri oryn alǵan oqıǵa haqynda bylaı dep málimdegen: «Arnaýly qyzmetkerlerdiń tekserýleri men saraptamalarynyń qortyndysynda jolaýshylar ushaǵynyń Ýkraınanyń shyǵysyndaǵy reseıshil separatıster jaǵynan atyp túsirilgendigi anyqtaldy». Bul týraly Los-Andjeles Taıms «Ýkraınadaǵy reseıshil separatısterdiń malaızııalyq ushaqty atyp túsirgendigi týraly alǵashqy dáleldemelerdi AQSh arnaýly qyzmetkerleri daıyndap boldy»,-deıdi keshegi aqparatynda. AQSh jaǵy jalǵasty túrde dáleldemelerdi izdestirip, saraptamalaryn jalǵastyryp jatqandyǵyn, sońǵy qortyndyny uzamaı jarııa etetindigin jazady Los-Andjeles Taıms. Batys aqparat quraldaray Ýkraınanyń bir joǵary laýazymdy qyzmetkeriniń CNN-ge «Býk» zymyran kesheniniń qarańǵy túnde Reseıge bet alǵan beıne jazba týraly aıtqandyǵyn jarııalap otyr. Alaıda, Ýkraınanyń halyqaralyq ister jónindegi keńesshisi Anton Gerashenkonyń «Malaızııalyq ushaqty atyp túsirgen zymyran Reseıge baıaǵyda áketilip boldy jáne onyń kózi qurtylyp úlkerdi.»,-dep boljam jasaıdy. Bul týraly «the guardian» keshegi aqparatynda «Shyǵys Ýkraınadaǵy separatıster malaızııalyq ushaqty atyp túsirdi dep boljanǵan Býk zymyran keshenine qatysty barlyq aqparattar men jalǵanymdardyń kózin qurtýda»,- dep otyr. Separatısterdiń baqylaý aýmaǵyna jatatyn Snejnoe men Torezdiń arasyndaǵy ushaq apatqa ushyraǵan mańaıda ketip bara jatqan «Býk» zymyran kesheniniń vıdeolary men fotolary separatısterdiń saıttarynan óshirilgen. Ýkraına arnaýly qyzmetkerleriniń ushaq apatyna separatısterdiń qatysy bar ekendigin aıǵaqtaıtyn aýdıo jazbany jarııalaǵanyn da aıta keteken «the guardian»: «Reseı Ýkraınadaǵy separatısterge búkil aıǵaqtardy, ınternet jarııalanymdarymen qosyp, barlyǵyn óshirýge buıryq bergen bolýy ábden múmkin»,- degen NATO-nyń arnaýly qyzmetkeriniń pikirin ortaǵa salady.

« Bul alǵashqy dáleldemeler men saraptamalar Reseıge tipti de qysym ákelýi jáne AQSh pen onyń Eýropadaǵy odaqtastary Máskeýge qarata jańa qadamdarǵa barýy múmkin»,-deıdi batys aqparat quraldary. Alaıda, AQSh prezıdenti keshegi málimdemesinde bul týraly kimniń «qandyqol» ekendigin aıtýda asyǵystyq tanytpady. Los-Andjeles Taımstyń aıtýynsha, keshe AQSh prezıdenti Barak Obama 298 adamnyń janyn jalmaǵan Malaızııalyq Being 777 ushaǵynyń reseıshil separatısterdiń baqylaýyndaǵy aýmaqta atyp túsirilgendigin málimdegen. «Ázirge mynany anyqtap boldyq: jolaýshylar laıneri «jer-áýe» sanatyndaǵy zymyranmen atyp túsirilgen. Al bul atyp túsirý reseıshil separatısterdiń baqylaýyndaǵy terrıtorııada oryn alyp otyrǵany da anyq»,-degen Barak Obama aq úıdegi málimdemesinde. AQSh prezıdenti shyǵys Ýkraınadaǵy separatısterge Reseı tarapynan kóptegen joǵary qýatty qarýlar men astyrtyn áskerı kómekter berilip jatqandyǵyn da qadap aıtqan. Al, Keshegi CNN aqparatyna negizdelgende, bul is haqynda «Eger reseıshil separatısterdiń ushaqty atyp túsirgendigi dáleldense, onda mamandar Reseıdiń qurylǵyny meńgerýge kómek bergendigin de joqqa shyǵara almaıdy»,-deıdi AQSh-tyń BUU-daǵy ókili Samanta Paýer. Ol taǵy Reseı endi Ýkraına daǵdarysy jóninde durys qadamdar jasaýy qajettigin aıtyp ótken. « Reseı ǵana bul soǵysqa núkte qoıa alady. Aqıqatynda Reseı bul soǵysty mindetti túrde aıaqtatýy tıis»,-deıdi Paýer. Onyń aıtýynsha, AQSh pen Ýkraına dıplomatııalyq jolmen sheshýge talpynsa da, alaıda, Máskeýdiń qyńyrlyǵy bárin qıyndatyp turǵan kórinedi. Al áýe laınerdi separatısterdiń atyp túsirgeni jaıyndaǵy aıǵaq-dáleldemelr týraly AQSh ókili bylaı deıdi: «Alǵashynda separatıster ushaqty atyp túsirgeni týraly áleýmettik jelilerde jar salyp, maqtanǵandaı bolyp edi. Keıin onyń kózin qurtyp úlgerdi.» «Bir jolda 300-ge jýyq jazyqsyz jannyń ómirin qıdy. Olardyń arasynda áıelder, balalar jáne álemniń ár eliniń azamattary boldy»,-degen Ýkraına prezıdenti Petro Poroshenkonyń sózi men Reseı prezıdenti Vladımır Pýtınniń kináni Ýkraınanyń ózine aýdarǵandyǵyn aıtqan CNN-dyqtar: «beısenbidegi malaızıalyq ushaqtyń apatynan keıin, Ýkraına men Reseı bir-birin jazǵyryp, jaýapkershilikten bastaryn ala qashýda»,-deıdi. Deılı Meıldiń aıtýynsha, Malaızııalyq Being 777 áýe laıneri atyp túsirilgen dál sol ýaqytta, sodan 15 km qashyqta Sıngapýr áýe kompanııasynyń ushaǵy da ótip bara jatqan-dy. jáne sol kúni 55 ushaq sol qaýipti zonadan ótken eken.

Aıtpaqshy, Ýkraına tarapynyń sońǵy aqparattaryna súıensek, separatıster ushaqtaǵy tólem kartalary men asyl buıymdarǵa da qol salǵan kórinedi...

«Deılı-Meıl», «Ýoll-strıt djornal», « Vashıngton Post», CNN, «Los-Andjeles Taıms», «The guardian» gazetteriniń aqparattaryna sholý jasaǵan:

Talǵar Dálelǵazy