Qazaqstandy Reseıdiń "oblysy" kóretinderdi nege jazaǵa tartpaımyz?!

Qazaqstannnyń táýelsiz egemendi memleket retinde damýynyń basty sharty – Ulttyq qaýipsizdikti qamtamasyz etý. Elimizdiń Ulttyq qaýipsizdigi «Qazaqstan Respýblıkasynyń Ulttyq qaýipsizdigi týraly» QR Zańymen qorǵalǵan. Atalmysh zańda «memlekettik organdardyń, menshik nysandaryna qaramastan uıymdardyń jáne azamattardyń ulttyq qaýipsizdikti qamtamasyz etý salasyndaǵy quqyqtyq qatynastaryn retteıdi, Qazaqstan Respýblıkasynyń ulttyq qaýipsizdigin qamtamasyz etýdiń maqsatyn, júıesi men baǵyttaryn belgileıdi» dep jazylǵan.

«Qazaqstan Respýblıkasynyń Ulttyq qaýipsizdigi týraly» zańynyń 5-babynyń 2) –tarmaǵyna sáıkes, «konstıtýsııalyq qurylysty kúshtep ózgertýge baǵyttalǵan is-áreket, onyń ishinde Qazaqstan Respýblıkasynyń biregeı qurylysyna, tutastyǵyna, qol suǵylmaýshylyǵyna, aýmaǵynyń bólinbestigine qııanat keltiretin is-áreket Qazaqstan Respýblıkasynyń ulttyq qaýipsizdigine tónetin qaýip-qater bolyp tabylady.

Alaıda, Reseı men Ýkraına arasyndaǵy jaǵdaıdan keıin Ulttyq qaýipsizdik týraly zańdy belshesinen basyp, Qazaqstannyń Reseıge qosylýyn áleýmettik jeliler arqyly ashaqtan-ashyq nasıhattaýshylar paıda boldy.

Ermek Taıchıbekov atty azamat óziniń feısbýktegi jeke paraqshasynda Jambyl oblysynda turatyn, Qazaqstannyń Reseıge qosylǵanyn qalaımyn deıtin azamattardy taýyp, beınetaspaǵa túsirip, ony áleýmettik jelide- youtube.com saıty arqyly jarııalaǵan. Sol arqyly «búkil jambyldyqtar Qazaqstannyń Reseıge qosylýyn qalaıdy» dep kórsetkisi kelgen bolsa kerek. Beınejazbada «Reseıge qosylý armanym», «Qazaqstan Reseıdiń gýbernııasy bolǵanyn qalaımyn» degen sózderdi azamattardyń aýyzyna salyp bergeni baıqalady. Tipti, qasyna eki balasyn erte shyqqan bir azamat el prezıdenti Nursultan Nazarbaevqa qarata «qarapaıym adamdarǵa egemendiktiń qajeti qansha, shekarany alyp tasta» dep soǵady.

Sózimiz dáleldi bolý úshin birneshe beınejazbany nazarlaryńyzǵa usynyp otyrmyz.

«Ar-namysyma til tıgizdi» dep jýrnalısterdi sotqa beretin aq jaǵalylar men quqyq qorǵaý organdary ulttyq qaýipsizdigimizge, egemendigimizge, tutastyǵymyzǵa qaýip tónip jatqanda qaıda qarap otyr? Shamasy olarǵa ulttyq qaýipsizdikten, eldiń egemendiliginen góri óziniń abyroı bedeli artyq-aý shamasy?!

Esterińizge sala ketsek Almatyda bir top «namysshyldar» «Gıtlerdiń sýretin jýrnal muqabasyna basyp shyǵaryp, ar-namysymyzǵa nuqsan keltirdi» dep «Ańyz adam» jýrnalyn sotqa bergen edi. Sondaı-aq, Qaraǵandy qalalyq maslıhatynyń jumysyn synaǵany úshin halyq qalaýlylary jergilikti «Vzglıad na sobytııa» gazetin sotqa bergen bolatyn. Al ulttyq qaýipsizdigimizge qaýip tóndirip júrgenderge kelgende, bári aýzyna qum quıǵandaı bolyp otyrǵany túsiniksiz. Al quqyq qorǵaý organdarynyń únsizdigine ne aıtaryńdy bilmeısiń. Joq álde isti qupııa túrde júrgizip jatyr ma eken?

BAQ týraly zańǵa jalǵan aqparat, qaýeset taratý arqyly memlekettiń turaqtylyǵyna, tulǵalardyń jeke basyna zııan keltirgeni úshin qylmystyq jaza qarastyrýdy engizgender óz abyroı-bedelin, qara basynyń qamyn oılaǵan-aý shamasy.

Reseıge qosylýdy nasıhattaýshylardyń kóksegeni ne? Joq álde olar áldebir kúshterdiń qarjysyna qoǵamdyq uıym quryp, solardyń soıylyn soǵyp júrgender me? Olardyń áreketi – otanǵa jasalǵan qııanat. Eger olaı bolsa, olardyń is-áreketterine shuǵyl túrde tosqaýyl qoıylyp, elin aqshaǵa satqany úshin olarǵa eń aýyr jaza qoldanylýy tıis.

"Alash aınasy"