"Elektrondy jaınamaz" namazǵa erterek kelýińizge kómektesedi

Orys bodanynda bolyp, «kommýnızmniń» qamytyn kıgen qazaq eli táýelizdigin ala salyp, óziniń ata dini ıslamǵa bet burdy. Áýel basta ártúrli din ókilderi men ıslamnyń san alýan aǵymdaryn tyqpalaǵan mysyqtileýlerdiń joly birtindep kesilip jatyr.  Búgingi qazaq Alla Taǵala paryz etken 5 ýaqyt namaz ben 5 paryzyn óteýdi, quran kórsetken aqıqat jolymen júrýdi qup kóredi. Sol úshin de memleket pen qoǵam óz álinshe eńbektenip jatyr. Al «musylmanǵa bolsyn» dep qyzmet etip jatqan jekelegen azamattardyń qatary da az emes. Solardyń biri – Qazaqstan táýelsizdiginiń alǵashqy jyldarynda atajurtqa oralǵan qandasymyz Alhanbaı Satybaldyuly. Alhanbaı myrzanyń qazaq kóshi men ult namysy synǵa túsken sátterde keýde kerip shyqqany óz aldyna bólek áńgime. Ol ­- bul kúnde barsha musylmanǵa arnalǵan «Elektrondy jaınamazdyń» avtory.

Namaz qalaı oqylady? Namazda oqylatyn súreler men aıtylatyn duǵalar qandaı? Jaınamazda otyryp, sonyń bárin ıgerýge bola ma? Osy suraqtardyń jaýabyn Alhanbaı myrza jasaǵan «Elektrondy jaınamazdan» taba alasyzdar. Bir aıta keterligi, ádettegi jaınamazdardyń uzyny kóbinde 110 sm bolsa, bul jaınamaz 140 sm-ge laıyqtalǵan. Alhanbaı myrzanyń aıtýynsha, bul jaınamaz arqyly namazdyń úrkinderin sharıǵatqa saı tolymdy oryndaýǵa bolady. Iаǵnı Namazhan sájdege jyǵylyp, rýkýǵqa turǵandaǵy barlyq qımylyn qalyptasqan úlgige saı fızıologııalyq turǵyda densaýlyqqa da paıdaly etip jasaı alady.  «Biz namaz oqyǵanymyz arqyly Alla Taǵaladan sheksiz saýap alamyz, soǵan saı namazdyń úrkinderin de tolyq, durys oryndaı alsaq teńdessiz shıpaǵa qol jetkizemiz. Iаǵnı namaz oqyǵanda quran súrelerin durys oqý qanshalyqty mańyzdy bolsa, namazdyń úrkinderin de durys oryndaý sondaı mańyzdy.», - deıdi Alhanbaı myrza. Onyń ústine «elektrondy jaınamazdar» túgeldeı ártúrli boıaýda, qazaqy naqyshpen bezendirilgen.

Quran tiliniń barlyq musylmanǵa ortaq ekenin eskersek, atalmysh jaınamazdyń dúnıejeúzindegi ózin «musylmanmyn» dep esepteıtin kez kelgen adamǵa qajet ekendigi sózsiz. Alhanbaı myrzanyń armany da sol. «Elektrondy jaınamaz» múmkindiginshe álem musylmandarynyń nazaryna iligip, bir maqsat, bir nıette bolsaq, ulttyq úlgide tigilgen Qazaqstan jaınamazy shartarapty sharlasa nur ústine nur bolar edi», - deıdi ol.

Jınaqtap aıtqanda, «elektrondy jaınamaz» arqyly  namazda oqylatyn súrelerdi durys oqýǵa, namazdyń úrkinderin durys oryndaýǵa, tıisinshe ulttyq oıý-órnekterimizdi ulyqtaýǵa da qol jetkize alamyz.

Haziret Ábdilda