Париждегі ондаған мұражай, оның ішінде Лувр мұражайы қарсылық акцияларына байланысты сенбіде жұмыс істемейтін болды. Мұражайлар басшылығы манифестанттар тәртіпсіздік жасап, мұражайды қиратуы мүмкін деп қауіптенеді. Сонымен қатар, мэрия Париждің бірнеше ауданында бизнес иелерінен қосымша қауіпсіздік шараларын жасауды сұрады.
Францияда наразылар биліктен жанармай салығын қымбаттатпауды талап етіп, ереуілдетіп жатқанына үш апта болды. Ереуілдерді «Сарғылт жилет» қозғалысы ұйымдастырып отыр.
Өткен сенбіде Парижде болған демонстрацияға биліктің мәліметінше 75 мың адам қатысты. Демонстрация соңы тәртіпсіздікке ұласып, 130-дан астам адам зардап шекті, 400-ге тарта адам тұтқындалды. Бетперде киген адамдар дүкен сөрелерін қиратып, Салтанат қақпасын зақымдады. Париж мэриясы тәртіпсіздіктерден келген шығынды 3-4 миллион еуро деп бағалап отыр.
Наразылық шерулерінен соң 5 желтоқсанда Франция үкіметі жанармай салығын өсіруге алты ай мерзімге мораторий жариялады.
Пікір қалдыру
пікір