Berlın polısııasy Reseı basqynshylyǵyn jaqtaıtyn 10 adamdy ustady

Berlın polısııasy jeńis kúnine arnalǵan sherýde Reseıdiń Ýkraınaǵa jasaǵan basqynshylyǵyn dáripteıtin belgiler ustap kelgen 10 adamdy quryqtady. Bul týraly Bild gazeti jazdy. 

Basylym málimetinshe, 9 mamyr kúni Tırgarten men Treptov saıabaǵyndaǵy eskertkishterge júzge jýyq adam kelgen. Polısııa kire beriste kelgen adamdarda tyıym salynǵan zattardyń bar-joǵyn teksergen. Tekseris nátıjesinde tártip buzyp, polısııa qyzmetkerlerin balaǵattaǵan 10 adam ustalǵan.

Olar Reseıdiń Ýkraınaǵa jasaǵan basqynshylyǵyn qoldaıtyn kıim kıip, tý men tósbelgiler ustap kelgen. 

Aıta keteıik, buǵan deıin Berlın polısııasy 9-mamyrda ótetin sherýlerde Reseı basqynshylyǵyn dáripteıtin zattar, arnaıy jalaýlar men georgıı lentasyn ustap kelýge tyıym salǵan.