Abaı oblysy Úrjar aýdanynda «Móldir bulaq» aksııasy aıasynda ózender men bulaqtar tazartyldy

Abaı oblysy Úrjar aýdanynda «Móldir bulaq» aksııasy aıasynda ózender men bulaqtar tazartyldy, dep habarlaıdy Qamshy.kz aqparat agenttigi.

Úrjar aýdanynda «Taza Qazaqstan» respýblıkalyq eko-aksııasynyń «Móldir bulaq» aptalyǵy aıasynda Úrjar aýylynyń «Qaıyńdy baq» jáne «Bolashaq» saıabaqtaryndaǵy bulaqtar men ózenderdi tazalaý júrgizildi.

Ekologııalyq is-sharaǵa aýyl turǵyndary, eriktiler men belsendi jastar qatysyp, bulaqtardy qoqystardan tazartty. Aksııaǵa 150-den astam adam belsendilik tanytyp, týǵan ólkeniń tazalyǵyn saqtaýǵa óz úlesterin qosty.

Aýyl turǵyny, ári eńbek ardageri Amangeldi Ospanov «Taza Qazaqstan» aksııasy durys bastama dep esepteıtinin jetkizdi.

«Búgin aýyl turǵyndary men jastar bizdiń saıabaqtardaǵy bulaqtar men ózenderdi tazalaý úshin kóshege shyǵyp, aýdannyń barlyq turǵyndaryn eko-aksııaǵa qatysýǵa shaqyrdy. Men týǵan ólkemniń patrıoty retinde jas urpaqqa úlgi bolatyn aýqymdy is-sharaǵa óz úlesimdi qostym», -dedi Amangeldi Ospanov.

«Jas suńqar» eriktiler tobynyń múshesi Serik Sársenbaev tazalaý kezinde plastıkalyq qaldyqtarǵa erekshe nazar aýdarylǵanyn aıtty.

-Búgin biz, «Jas suńqar» eriktiler tobynyń músheleri, aýdan jastarymen birlese otyryp, Úrjar aýdanyndaǵy súıikti demalys oryndaryna aınalǵan «Qaıyńdy baq» jáne «Bolashaq» saıabaqtaryndaǵy bulaqtardy tazaladyq. Sonymen qatar, ózen arnalaryn qoqystardan, plastık qaldyqtardan tazarttyq. Barlyq jerlesterimiz ben jastarymyzdy týǵan elimizdiń tazalyǵyn saqtaýǵa jáne osyndaı ekologııalyq is-sharalarǵa únemi qatysýǵa shaqyramyn, -dep qorytyndylady Serik Sársenbaev.

Aýdanda barlyǵy 50-den astam iri jáne kishi bulaq kózderi bar. «Móldir bulaq» aptalyǵy aıasynda bulaq kózderin tazalaý jumystary jalǵasady.