«Tórt adam izdestirilýde». Almatyda túnde laı kóshkini júrip, eki úıdi basyp qaldy

Almatyda «Taý-samaly» yqsham aýdanynda búgingi túngi 02:20 ýaqytynda laı kóshkini júrip, eki jer úıdi basyp qaldy. Oqıǵa ornynda izdeý-qutqarý jumystary áli jalǵasýda. Tańerteń Almaty qalasynyń ákimi Erbolat Dosaev tehnogendik sıpattaǵy apat ornyna shuǵyl kelip jetti. Oqıǵa sebepterin anyqtaý jáne apat saldaryn joıý jóninde jedel kóshpeli keńes quryldy. Tańǵy saǵat 08:00-degi jaǵdaı boıynsha izdeý-qutqarý jumystary áli jalǵasýda. 

«Bir úı bútindeı, bir úı jartylaı búlingen. Bir úıdiń otbasy músheleri izdestirilip jatyr: 4 adam, onyń ekeýi  - bala. Apat oryn alǵan kóshedegi úılerdiń bir-birine óte jaqyn ornalasýy tótenshilikterdiń jumysyna belgili bir deńgeıde kedergi keltirýde», delingen qalalyq TJD habarlamasynda.

Sol mańdaǵy úılerdegi (jer úı) adamdar arnaıy oryndarǵa evakýasııalandy. Birneshe saǵattan keıin olar óz erkimen týystarynyń, dostarynyń úılerine baratynyn aıtyp, tarqasqan.

Oqıǵa ornynda "Qazseldenqorǵaý" MM, Almaty qalasynyń "109 qutqarý qyzmeti" MM, Respýblıkalyq jedel-qutqarý jasaǵy, Almaty qalasy TJD, TJM 28237 áskerı bólimi, jedel medısınalyq kómek brıgadasy, Medeý aýdanynyń ákimdigi qyzmetkerlerin qosa alǵanda,  160-tan astam adam jáne 30 birlik tehnıka jumys istep jatyr.