ShQO-da 157 jas prezıdenttik kadr rezervine tapsyrdy

Oblysta 70 myńnan astam memlekettik qyzmetker jumys isteıdi. Onyń 54 paıyzyn jastar quraıdy. Bul týraly aımaqtyq kommýnıkasııalar qyzmetinde ótken brıfıngte  QR Memlekettik qyzmet isteri agenttiginiń ShQO boıynsha departamentiniń basshysy Janna Qabdoldaqyzy málim etti.

Brıfıngte Prezıdenttik jastar kadrlyq rezervine qalaı qatysýǵa bolatyny týraly keńinen túsindirildi. 

– Oblysta 23-29 jas aralyǵyndaǵy 86 adam jumys isteıdi. Al 30-39 jas aralyǵyndaǵy 518 qyzmetker basshylyq qyzmetterdi atqarady. Onyń ishinde oblys ákiminiń bir orynbasary, úsh qala men aýdan ákimi, oblystyq basqarmasynyń 10 basshysy men 45 aýyldyq okrýgtiń ákimi bar, – dedi Janna Qabdoldaqyzy.

Prezıdenttik jastar kadrlyq rezervine qatysý úshin úmitkerlerge bar bolǵany PKRezerv.kz saıtyna tirkelý qajet. Oǵan keminde 5 jyl jumys ótili bar, 35 jasqa tolmaǵan Qazaqstan Respýblıkasynyń joǵary bilimdi azamaty úmitker bola alady. Tirkeý onlaın platformada júrgizilmek. Brıfıngke qatysqan «QR Prezıdentiniń janyndaǵy memlekettik basqarý akademııasynyń» ShQO-daǵy fılıalynyń dırektory Sergeı Kovalev osylaı dedi.

– Birneshe kezeńnen turatyn irikteýde úmitkerler aldymen testten ótip, esse jazady. Bul qatysýshylardyń oı-órisin, jazý qabiletin, aqparatty saraptaı alýy men jeke qasıetterin baǵalaýǵa múmkindik beredi. Alǵashqy kezeńnen súrinbeı ótkender beınejazbalar arqyly óz jobalaryn qorǵaıdy. Jobalardyń áleýmettik mańyzy bolýy shart. Ár kezeńniń baǵasy esepke alynyp, úmitkerge ortasha upaı qoıylady. Ozyp shyqqandarmen eksperttik komıssııa jeke kezdesý ótkizedi. Eń kóp ball jınaǵan qatysýshylardyń kandıdatýrasy Prezıdenttiń jastar kadrlyq rezerviniń Ulttyq komıssııasynyń otyrysynda belgili bolady, – dedi Sergeı Kovalev.